بعد اختياره للغناء في نهائي كأس العالم.. سهير جودة: ويجز تلخيص لشباب كتير عندهم أحلام

مصطفى الجداوي
نشر في: السبت 17 ديسمبر 2022 – 8:59 م | آخر تحديث: السبت 17 ديسمبر 2022 – 8:59 م

حرصت الإعلامية سهير جودة، على تهنئة مطرب الراب المصري ويجز، في اختياره للغناء في حفل ختام نهائي كأس العالم قطر 2022، قائلة: «من يدعمه الجمهور هو بالجمهور مكتفي لا يعطله أحد، هو ده ويجز، ويجز هو تلخيص لشباب كتير عندهم أحلام، هو مصدق نفسه وحلمه عشان كده هو بالنسبة للشباب النجاح العصامي اللي بدأ من السوشيال ميديا».

وأضافت جودة في برنامجها الذي يحمل اسم «الستات»، والمذاع عبر فضائية «النهار»، قائلة: « لما الصفحة الرسمية للاتحاد الدولي لكرة القدم أعلنت أن أغنية عز العرب لمغني الراب المصري ويجز هتبقى إحدى أغاني ألبوم كأس العالم، دي المرة الأولى اللي بيشارك فيها مغني مصري في الألبوم الرسمي للبطولة، وهو ترند رقم ٢ على يوتيوب، وهنشوفه في حفل ختام كأس العالم».

وتابعت: «ناس كتير جدا شايفين ويجز إنه نموذج ملهم، وناس تانية شايفين اللي بيقدمه مش غناء، لو ذوقنا الشخصي هنقيس بيه الأحداث هنلاقي حاجات كتير مش فن، وخلينا نقيس بنسبة النجاح والنجومية، أكيد في ناس مصدقه ويجز، هو عنده شئ مختلف، هو حالة مختلفة، ولد ابتدى صغير والنهاردة عنده ٢٤ سنة، وحقق شهرة عالمية واسمه بيتردد باحترام بين النجوم.. إذا هو عنده شئ مميز ومختلف».

واستكملت: «أنا قريبة للناس اللي ذوقهم مش ويجز في الأغاني، لكن لازم نحترم هذا النجاح، أغنية عز العرب بالمناسبة حلوة جدا هو كاتب كلماتها، وخلينا ندعم الشباب المصري، وويجز نموذج بيحقق حلم الشباب في النجاح و الإنجاز، وبيتقبل الأخر، اعتقد الأجيال الجديدة معندهمش تنمر وعنصرية زي اللي كانت في الأجيال السابقة».

واختتمت: «مش بالضرورة نكون متفقين كلنا على ذوق واحد، لكن منحكمش على حد بذوقنا الشخصي ونقول إن ده لا يتوافق مع ذوقي فيبقى إيه الذوق ده والفشل دا، خلينا نبقى موضوعيين في الحكم، وشئنا أم أبينا ويجز هو نجم ملهم للجيل الحالي».

عن 7Star

مهتم بمجال ال SEO , اقدم لكم موقع اخبار 7 نجوم كل اللي انت عايزة هتلاقيه في المدونة , اخبار عاجلة , اخبار الفن , مقالات ثقف نفسك , ومعلومات هامة .